Club de lectura virtual

Palabras de Caramelo

2011-03-31T16:52:00.003+01:00

O próximo luns, 4 de abril, teremos unha nova sesión do club de lectura Auga da Laxe. Nesta ocasión o libro proposto é Palabras de Caramelo, de Gonzalo Moure, unha novela que nos presenta a relación de amizade entre Kori, un neno saharauí xordomudo de oito anos, e un camelo. Unha historia de silencios e palabras, de conversas coas mans e co corazón, de amizade e de dor. Unha historia que nos levará ata Smara e que nos permitirá achegarnos á vida cotiá dos campamentos de refuxiados de Tinduf, onde vive o pobo saharauí, ese pobo que Gonzalo Moure visita con frecuencia nunha relación tamén de amizade, que o levou a participar en proxectos tan fermosos como o Bubisher. Alí, en Smara, é onde Kori vai á escola e devece por aprender a escribir.

A mansión dos Pampín

2010-12-14T09:37:00.002Z

A mansión dos Pampín, de Miguelanxo Prado, será a lectura proposta para a próxima sesión do club de lectura Auga da Laxe, que terá lugar o luns, 20 de decembro, de 15:00h a 17:00h. Nesta ocasión achegarémonos a un álbum de banda deseñada no que se fala de caos urbanístico e de feísmo arquitectónico en clave de humor, unha interesante proposta que formou parte do Proxectoterra, promovido polo Colexio Oficial de Arquitectos de Galicia. Na biblioteca tedes exemplares ao voso dispor.

Tamén se pode ler aquí e mesmo pode verse en Vimeo unha versión dramatizada, realizada desde o IES Ferrolterra.

21 relatos contra el acoso escolar

2010-05-26T10:38:00.004+01:00

O próximo 31 de marzo ás 15:00h teremos a última sesión do club de lectura deste curso. Propuxemos a lectura de cinco relatos do libro 21 relatos contra el acoso escolar:

"Aprende", de Espido Freire.
"La diferencia", de Lola Beccaria.
"¿Conocéis a Silvia?", de Marta Rivera de la Cruz.
"Tú, no", de Martín Casariego.
"Sueño cumplido", de Ana Alonso.

Con esta proposta queremos darlle continuidade ao proxecto Derrubando valados que iniciamos no 2º trimestre coa lectura de Valados, de Agustín Fernández Paz, reforzado logo con traballos desenvolvidos desde diferentes materias arredor da existencia de valados físicos na nosa sociedade. Centrámonos agora nos valados invisibles, eses que marxinan e discriminan aínda que non se vexan fisicamente.

Valados, de Agustín Fernández Paz

2010-03-04T21:20:00.006Z

Este pasado luns 1 de marzo celebramos a sesión trimestral do club de lectura do instituto. O libro escollido nesta ocasión foi Valados, de Agustín Fernández Paz. A sesión, na que participamos 16 alumnas e 12 profesores e profesoras, comezou na cafetería cun xantar compartido e continuou logo na biblioteca, onde lemos e comentamos o folleto que preparamos para a sesión, vimos unha presentación de imaxes e textos sobre os valados no mundo, lemos o poema "Irmaus" de Celso Emilio Ferreiro e comentamos o libro. Falamos de moitos aspectos: do acerto de que a historia estea enfocada desde a perspectiva de dous nenos, da importancia de que prevaleza o esforzo por comunicarse a pesar dos valados e de todas as dificultades, das ilustracións de Xan López Domínguez, do final aberto, etc. Tamén falamos doutras cousas que non están no libro, pero que xurdiron a partir da lectura: os valados que existen ao noso redor, no propio instituto por exemplo. Unha sesión interesante e unha lectura das que provocan moitas reflexións.

"Barro de Medellín", no club de lectura

2009-11-26T17:50:00.015Z

O 14 de decembro teremos a sesión presencial do club de lectura Auga da Laxe para falar de Barro de Medellín, de Alfredo Gómez Cerdá, unha novela protagonizada por dous nenos, Camilo e Andrés, que percorren as rúas do seu barrio na cidade de Medellín mentres falan do seu futuro e reflexionan sobre a propia cidade. A pesar da difícil situación familiar e da presión de ter que conseguir cada día as botellas de augardente que bebe o seu pai, Camilo é feliz en Medellín co seu amigo Andrés. Ao seu carón, o parque biblioteca do seu barrio chamará por eles como unha tentación próxima e distante ao mesmo tempo.

Nesta fotografía pódese ver o barrio de Santo Domingo Savio, onde transcorre a historia da novela, co metrocable do que tanto falan Camilo e Andrés e a imaxe poderosa da biblioteca. En Medellín construíronse en diferentes barrios parques biblioteca para reforzar a educación e a cultura. Se queredes saber máis sobre este proxecto de parques biblioteca, podedes pinchar aquí.

Estamos seguros de que a lectura de Barro de Medellín vos vai crear un vínculo de interese con esta cidade colombiana, un vínculo que sente tamén Alfredo Gómez Cerdá, quen no seu blog fala das súas impresións ao regresar á cidade de Medellín para presentar esta novela.

Aquí vos deixamos tamén algúns vídeos sobre o proxecto dos parques biblioteca de Medellín.

Jean Alexis, niño guía turístico en la Biblioteca Santo Domingo Savio from Francisco Cárdenas on Vimeo.

Podedes picar en comentarios e deixarnos as vosas impresións sobre a novela ou sobre a información que vos achegamos nestes materiais sobre a cidade de Medellín e os seus parques biblioteca.

As vosas recomendacións de lecturas

2009-03-25T16:30:00.003Z

Neste espazo, picando en "comentarios", podedes deixarnos as vosas recomendacións de lecturas para compartir. Con elas poderedes conseguir, ademais, bibliopuntos e sobres de cromos para o álbum Os ríos de palabras de Agustín Fernández Paz.

4x4, lectores e lectoras todoterreo

2009-02-26T10:17:00.002Z

Abrimos aquí este espazo para aqueles grupos de catro alumnas e alumnos que se animen a participar na actividade 4x4, lectores e lectoras todoterreo. Na biblioteca tedes 20 lotes de catro libros do mesmo título para que os collades en préstamo, os leades e logo nos deixedes aquí as vosas opinións e comentarios.

Os Megatoxos e a espada esmeralda

2008-06-04T17:38:00.005+01:00

Estes días entraron na nosa biblioteca 5 exemplares da nova entrega das aventuras dos Megatoxos. A visita de Anxo Fariña no 1º trimestre deixou moitos fans dos Megatoxos polo que eses cinco exemplares duraron moi pouco nos andeis e andan xa polas mans do noso alumnado. Agardamos que nos vaian contando aquí o que lles pareceu esta nova e esperada aventura de Ruxe, Faísca, Ninfa e Lúa.

As vosas recomendacións

2008-05-12T00:51:00.004+01:00

Convidámosvos a que deixedes aquí as vosas recomendacións de lecturas. Ademais de compartilas, poderedes conseguir bibliopuntos e sobres de cromos para o álbum editado pola biblioteca. Non tedes máis que picar en comentarios, indicar o voso nome e curso e falarnos dese libro que tanto vos gustou...

La Tierra herida

2008-03-12T20:17:00.002Z

La Tierra herida. ¿Qué mundo heredarán nuestros hijos? de Miguel Delibes e Miguel Delibes de Castro é o libro proposto para a próxima sesión de Club de lectura.

Cun cento de preguntas, dúbidas e intercambio de coñecementos Os autores repasan os problemas ambientais aos que nos enfrontamos: cambio climático, a perda de biodiversidade, a escaseza de auga, a superpoboación ou a desertificación.

A sesión do Club de lectura está convocada para o mércores 16 de abril de 2008, ás 18:00.

As aventuras de Said e Sheila

2008-01-14T09:12:00.000Z

Catro son as novelas de ficción científica de Ramón Caride Ogando que vos propoñemos para a próxima sesión do noso club de lectura, o 13 de febreiro ás 18:00h na biblioteca:

Perigo vexetal
O futuro roubado
Ameaza na Antártida
A negrura do mar

Os protagonistas das catro obras son Said e Sheila, dous irmáns que viven na década do 2070 e que, coma heroes de banda deseñada, loitan contra os perversos plans de personaxes sen escrúpulos que queren enriquecerse aínda que iso supoña destruír o noso planeta.

Convidámoste a ler estas catro novelas de aventuras e a que nos contes aquí as túas impresións. Por suposto, convidámoste tamén a participar na sesión de club de lectura que imos ter o día 13 na biblioteca coa presenza do autor.

Cartas de amor

2007-11-29T10:17:00.000Z

Cartas de amor, de Fran Alonso, é o libro proposto para a nosa sesión trimestral de club de lectura. Convidámosvos a ler este feixe de relatos que vos han de levar de viaxe a diferentes espazos xeográficos e a diferentes realidades sociais e persoais a través de mulleres valentes que se enfrontan a situacións difíciles: a pobreza, a guerra, a inmigración, o franquismo, a violencia, a prostitución, a presión social, a integración…

O día 19 de decembro, ás 18:00h, a nosa biblioteca acollerá unha sesión na que, coa presenza do autor, poderemos charlar sobre os relatos que compoñen este libro. Tamén nos podedes deixar aquí as vosas opinións e impresións.

Os Megatoxos e o aprendiz de druída, de Anxo Fariña

2007-11-04T20:05:00.000Z

Ruxe, Faísca, Ninfa e Lúa, compañeiros de escola, van compartir unha experiencia que mudará as súas vidas. A culpa tena un toxo moi especial que os levará a viaxar ao tempo e á terra dos celtas. Alí coñecerán o sorprendente mundo de Gael, pero tamén terán que enfrontarse ao terrorífico Drunxel. Vencerán cos seus poderes o malvado demo do corpo líquido?

Achégate ás aventuras dos Megatoxos e déixanos os teus comentarios.

Smara, de Paula Carballeira

2007-04-27T00:07:00.000+01:00

Smara comeza cun neno, un avión e o deserto do Sahara, como O principiño. Pero en Smara ese avión é o que leva o neno a un mundo que lle ha permitir coñecer as historias que lle conta a avoa Ugago mentres espera pola morte, historias marabillosas dun pobo -o saharauí- que un día tivo que abandonar a cidade de Smara para instalarse "nunha terra que ninguén quere". Alí, no exilio, os fillos da nube fundarán unha nova Smara na que seguir tomando té e contando historias. Convidámoste a que te achegues a elas desde este fermoso libro de Paula Carballeira, ilustrado por Carole Hénaff, e a que nos deixes aquí as túas impresións da lectura. Tamén te agardamos o 25 de maio, ás 18:00h, no instituto para conversarmos con Paula Carballeira.

O principiño

2007-03-01T23:37:00.000Z

O principiño é a historia dun piloto e un neno, dun año e unha flor, dun pozo, dunha raposa, dunha viaxe polo espazo... Pero é, sobre todo, unha fábula na que todos eses elementos presentes na historia nos falan das relacións entre as persoas, do amor e da amizade, do sufrimento e da dor. Traducido a máis de cen linguas e lido por millóns de persoas en todo o mundo, este libro leva provocado moitas reflexións e interpretacións nas que adquire un protagonismo especial a biografía, apaixonante e aventureira, do seu autor. Déixanos ti tamén a túa opinión.

Usha, María Reimóndez

2006-11-11T20:12:00.000Z

María Reimóndez, Usha, Xerais, Vigo, 2006.

Uxía, Usha para os seus amigos, fálanos da súa relación coa India, país onde pasa longas tempadas acompañando a súa nai, membro dunha ONG que traballa en proxectos de cooperación no estado de Karnata.
A súa vida na vila de Devastana pemitiralle facer amigos, aprender novas linguas e costumes e adquirir unha visión diferente da vida, froito dos contrastes entre o mundo do que ela procede e esa cultura nova que a acolle.